‏يا صاحب الهجر هجرك ويش سوّى بي
‏ويلك من الله ترفّق في عباد الله
‏نحلت عظامي من الهجران و ثيابي
‏لو تستر الجسم ماهي تستر العلّه
‏بكرة توقّف من اللهفه على بابي
‏نفسك من الشوق والحرمان منتلّه
‏لو تفقد أعصابك أنا ماسك أعصابي
‏ذق ما يذوقه حبيبٍ كان متولّه
‏عتاب قلبي على الهجران وعتابي
‏عليك يا بو رموش وقذلة هلّه
‏لا تسأل الناس عني لنّك ادرى بي
‏ولا تذكر الشوق لا كثره ولا قلّه
إن كان قلبك الى من جيت هلّابي
‏بعد البطا فانت قلبي كنت محتلّه
‏أعطيتني بعض ودّك لكن الغابي
‏أعطيته لشخص ما يستاهله والله
‏ما سامحك يالغلا والشوق غلابي
‏غدرت بي بعد ما خذت الغلا كله
‏بعلّمك عن سبب واحد من اسبابي
‏يدعو إلى الحزن واللي يسألك قله
‏ما زوّد الحزن إلا غدر الأصحابي
‏يا ليت قلبي حجر أو ليتهم قلّه
‏هاجر يا أول غرامي وآخر أحبابي
‏أنا عزيزٍ ما يرضي حبّه يذلّه
‏سيفي يقص الحجر من قو مضرابي
‏لكن أنا للضعافى ماني أسلّه
‏يا صاحب الهجر هجرك ويش سوّى بي
‏ويلك من الله ترفّق في عباد الله